THEMATA SERMONIS
Epistola in die sancto Pentecostes, quae in quinque clausulis dividitur.
In primis sermo de ipso Spiritu Sancto, et de proprietate chrysolithi, ibi: "Spiritus vitae erat in rotis." [de prima clausula]. Item sermo in eiusdem Spiritus Sancti solemnitate, ibi: "Iam advenerat dies tertius." Item de tribus linguis, scilicet serpentis, Evae et Adam, et de quattuor naturis ignis et eorum significatione.
de secunda clausula. Sermo de Sancti Spiritus infusione et animae resuscitatione et quadruplici mundi parte et ipsius significatione, ibi: "A quattuor ventis veni." Item sermo de arca Noe et ipsius quinque cameris et earum significatione, ibi: "Arca Noe." Item sermo de quinque sensibus corporis et eorum dispositione et proprietate et significatione, ibi: "Prima camera dicitur stercoraria".
de tertia clausula. Sermo de triplici soni genere et ipsius significatione, ibi: "Factus est repente." Item sermo ad poenitentes vel religiosos, ibi: "Iam advenerat dies tertius." Item de proprietate terrae et eius significatione, ibi: "Spiritus Domini replevit orbem." de quarta clausula. Sermo de confessione, circumstantiarum manifestatione et satisfactionis ardore, et linguae proprietate et dispositione et ipsius significatione, ibi: "Et apparuerunt illis dispertitae linguae." de quinta clausula. Sermo de Spiritus Sancti missione, ibi: "De excelso misit ignem," et ibi: "Adduxit Dominus spiritum super terram." Item sermo contra illos qui multa praedicant et pauca aut nulla faciunt, ibi: "Coeperunt loqui variis linguis."
EXORDIUM. DE SPIRITU SANCTO ET DE PROPRIETATE CHRYSOLITHI
1. "Cum complerentur dies Pentecostes, erant omnes discipuli pariter in eodem loco" (Act 2,1) etc.
Dicit Ezechiel: "Spiritus vitae erat in rotis" (Ez 1,20). Rotae volubiles fuerunt apostoli, Dei Filium per totum mundum deferentes. His rotis, ut idem propheta subinfert, erat species quasi visio lapidis chrysolithi. Chrysolithus lapis quasi aurum fulget, unde et dicitur; chrysos enim graece, aurum latine. Hic lapis videtur ex se emittere quasdam ardentes scintillas, et omne genus serpentium fugat, et significat apostolos, qui, auro septiformis gratiae splendidi, scintillas praedicationis alios incendentes ex se emiserunt, quibus omne genus daemonum effugaverunt. In his rotis, ut in eodem habes propheta, erat statura et altitudo et horribilis aspectus (cf. Ez 1,18). In apostolis enim fuit statura in rectitudine praeceptionis, altitudo in celsitudine supernae promissionis, horribilis vero aspectus in minis atque terroribus supplicii sequentis.
Unde dicit poenitens in Canticis: "Anima mea conturbavit me, propter quadrigas Aminadab" (Cant 6,11). Aminadab interpretatur spontaneus, et significat Iesum Christum, qui sponte pro nobis se obtulit in cruce, cuius quadrigae fuerunt apostoli, de quibus dicit Habacuc: "Et quadrigae tuae salvatio" (Hab 3,8), idest propter quas das salvationem; propter quas, idest propter quarum praedicationem, anima mea, inquit poenitens, conturbavit, idest simul turbavit, me ad poenitentiam. Unde Habacuc: Misisti in mare equos tuos, turbantes aquas multas; audivi et conturbatus est venter meus (Hab 3,15-16). Dominus in mare, idest in mundum, misit equos, idest apostolos, qui aquas multas, idest populos multos, sua praedicatione ad poenitentiam conturbarunt. Quorum praedicationem audivi, inquit poenitens, et conturbatus est venter meus, idest carnalitas mea.
I. DE INSPIRATIONE GRATIAE SPIRITUS SANCTI APOSTOLIS IN LINGUIS IGNEIS
"Cum" ergo "complerentur dies Pentecostes, erant omnes discipuli pariter in eodem loco." Nullus absens erat, vel quia numerus duodecimus completus erat, unum cor et unam animam habentes. "In eodem loco," scilicet in cenaculo, quod ascenderant. Qui enim Spiritum desiderat, carnis domicilium, mentis contemplatione transcendens, calcat. "Factus est repente de caelo sonus, tamquam advenientis spiritus vehementis, et replevit totam domum, ubi erant sedentes." Nescit tarda molimina Spiritus Sancti gratia, secundum illud: "Fluminis impetus laetificat civitatem Dei" (Ps 45,5). Cum sono venit qui suos venerat docere.
Unde habes concordantiam in Exodo: "Iam advenerat dies tertius et mane inclaruerat; et ecce coeperunt audiri tonitrua et micare fulgura, et nubes densissima operire montem, clangorque bucinae vehementius perstrepebat, timuitque populus qui erat in castris" (Ex 19,16). Primus dies fuit Christi Incarnatio; secundus, eiusdem Passio; tertius, Spiritus Sancti missio, quo adveniente "coeperunt audiri tonitrua," quia "factus est repente de caelo sonus" etc.; "et micare fulgura," idest apostolorum miracula; "et nubes densissima," idest cordis compunctio et poenitentia, "operire montem" Sinai, idest populum, qui erat in Ierusalem; unde in Actibus apostolorum dicitur, quod "compuncti corde dixerunt ad Petrum, et ad reliquos apostolos: Quid faciemus, viri fratres? clangorque bucinae," idest praedicationis, "vehementius perstrepebat;" unde Petrus: "Poenitentiam," inquit, "agite, et baptizetur unusquisque vestrum in nomine Iesu Christi in remissionem peccatorum vestrorum; et accipietis donum Spiritus Sancti" (Act 2,37-38)"; timuitque omnis populus, qui erat in castris, et ideo baptizati sunt et appositae sunt in hac die animae circiter tria millia" (Act 2,41).
Et nota quod ignis quattuor habet naturas: urit, purgat calefacit, illuminat. Similiter Spiritus Sanctus exurit peccata purgat corda, torporem excutit, ignorantias illuminat. Ignis etiam incorporeus et invisibilis est in sua natura, sed assumpto aliquo corpore videtur diversi coloris apparens, propter materias in quibus ardet. Sic Spiritus Sanctus videri non potest, nisi per creaturas, in quibus operatur.
Nota quod dispersio linguarum est facta in turre Babel (cf. Gen 11,8-9), secundum quod dispersit superbia, recolligit humilitas. In superbia, dispersio; in humilitate fit concordia. Ecce completur promissio Domini: Non vos relinquam orphanos, sed mittam Spiritum Paraclitum (cf. Io 14,18.26), qui eorum advocatus pro eis omnibus locutus est. Linguas attulit qui pro verbo venit. Cognationem habet lingua cum verbo, ut ab invicem non possint separari; sic Verbum Patris, idest Filius, et Spiritus Sanctus inseparabiles sunt, immo et unius naturae.
"Et repleti sunt omnes Spiritu Sancto, et coeperunt loqui variis linguis prout Spiritus Sanctus dabat eloqui illis." Ecce signum plenitudinis: plenum vas erumpit, ignis non potest occultari. Linguis omnibus loquebantur, vel sua, idest hebraea, lingua loquentes, ab omnibus intelligebantur, ac si propriis singulorum loquerentur. Spiritus Sanctus, "dividens singulis prout vult" (1Cor 12,11), ubi vult, quomodo vult, quantum vult, quando vult, quibus vult suam gratiam spirat. Quam nobis spirare dignetur, qui hodierna die in linguis igneis gratiam suam apostolis inspiravit. Cui sit semper laus et gloria per aeterna saecula. Amen.
II. DE SANCTI SPIRITUS INFUSIONE ET ANIMAE RESUSCITATIONE
Dicamus ergo: "Cum complerentur dies Pentecostes. Pentecostes" graece, "quinquagesima" dicitur latine: quinque decies ducti quinquaginta fiunt. Quinque sunt corporis sensus, decem praecepta decalogi. Si quinque sensus nostri corporis decem decalogi praeceptis fuerint perfecti, tunc procul dubio in nobis complebitur dies Pentecostes sacratissimus, in quo datur Spiritus Sanctus. De hac quinquagesima dicitur in Genesi, quod arca Noe habebat in latitudine quinquaginta cubitos (cf. Gen 6,15). Sed prius notandum quod ipsa arca habuit quinque cameras. Prima fuit stercoraria; secunda, apothecaria; tertia, immitium animalium; quarta, mitium; quinta, hominum et volucrum. Noe est vir iustus (cf. Gen 6,9), cuius arca est proprium corpus, quod bene dicitur arca. Arca dicta, quod arceat furem; sic corpus viri iusti a se debet arcere omne vitium, quod venit ut virtutes furetur. Huius arcae quinque camerae sunt quinque sensus, scilicet gustus, odoratus, tactus, auditus et visus.
Et duae venae, quae exeunt a cerebro, quarum una pervenit ad aurem dexteram et alia ad sinistram, sunt temperantia et obedientia. In dextera prosperitas, in sinistra adversitas designatur. Cum audis prospera et quod tibi placet, temperantia est necessaria; cum vero quod tibi praecipitur displicet et audis adversa, tunc obedientia magis est necessaria, quia magis fructuosa.
Et omne animal habens aures habet eas mobiles, praeter hominem. Hominis appellatione vere est dignus, qui non habet aures mobiles, idest qui non movetur a suae mentis stabilitate, propter ventum verborum. Omnis vero homo, qui habet prurientes aures, qui omni verbo credit, qui adulationi libenter aurem bibulam opponit, non homo sed brutum animal dignus est appellari.
Et nota quod arca Noe ad modum humani corporis fuit facta; habuit enim in longitudine tercentos cubitos, in latitudine quinquaginta, in altitudine triginta (cf. Gen 6,15). In corpore humano longitudo sexies est maior latitudine et decies maior altitudine. Est autem longitudo a planta usque ad verticem; est latitudo a crate lateris ad cratem; altitudo, a dorso ad ventrem. Si ergo quinque corporis sensus decem decalogi praeceptis fuerint perfecti, tunc vere arca Noe quinquaginta cubitis dilatabitur et quinquagesima adimplebitur, et vir iustus in fine suae vitae perfecte consummabitur. Unde in libro Sapientiae: "Consummatus in brevi explevit tempora multa; placita enim erat Deo anima eius" (Sap 4,13-14). Bene ergo dicitur: "Cum complerentur dies Pentecostes, erant omnes discipuli pariter in eodem loco." Discipuli viri iusti sunt affectus rationis et purae cogitationes mentis. Qui vere tunc sunt pariter in eodem loco, cum dies Pentecostes, idest quinque sensuum perfectio, adimpletur. Nota ista duo verba: "pariter" et "in eodem loco. Pariter", idest coaequaliter et simul. Illae mentis cogitationes pariter sunt quae, sub aequali regula rationis, ordinate componuntur et discrete procedunt, ut una non altior altera, nec alia inferior alia in mente appareat; quod si fieret, ipsa inaequalitas esset occasio ruinae virtutum fabricae. "Omnia", inquit Apostolus, ordinate fiant (cf. 1Cor 14,40), ut dicat huic: "Vade", et vadat, et alii: "Veni", et veniat, et servo, idest corpori suo: "Fac hoc," et faciat (cf. Mt 8,9). Sint etiam discipuli pariter, ut cogitationes mentis simul et in unum congregatae, tamquam acies militum (cf. Cant 6,3.9), aereas potestates fortiter valeant impugnare (cf. Eph 6,12). Sint et in eodem loco, non in diviso, quia mens divisa non impetrat. Unde dicit Ecclesiasticus: "Fili, ne sint in multis actus tui" (Eccli 11,10)";" et iterum:" Vae peccatori terram ingredienti duabus viis" (Eccli 2,14). Et gregorius: Fluvius, qui in multos rivos dividitur, a suo alveo desiccatur. Et bernardus: Animus distentus in multa, multis laceretur curis necesse est. Si dies Pentecostes primum fuerint completi, pariter et in eodem loco, erunt omnes discipuli ad suscipiendum parati gratiam Spiritus Sancti, quam nobis praestare dignetur, qui est benedictus in saecula saeculorum. Amen.
III. DE POENITENTIA AD RELIGIOSOS
"Et hoc quod continet omnia scientiam habet vocis. Et hoc," idest homo, animal rationale, "quod continet omnia" quattuor elementa, ex quibus omnia constant, "habet scientiam vocis," quia intelligit quando Spiritus sibi loquitur. Unde beatus bernardus: Toties nobis Spiritus Sanctus loquitur, quoties bona cogitamus. Unde Propheta: "Audiam quid loquatur in me Dominus Deus" (Ps 84,9); et sic sursum mentem vehit. Unde dicit philosophus, de descriptione spiritus: Spiritus est vehiculum virtutum, per quem virtutes exeunt ad suas peragendas operationes.
Rogemus ergo Dei Filium, ut spiritum contritionis nobis infundat, vae aeternum adimat, ad caelestia mentem vehat. Ipso praestante, qui est benedictus in saecula. Amen.
IV. DE CONFESSIONE LAUDIS ET CRIMINIS
Nota quod lingua est instrumentum sensus gustus, et ille sensus maxime est in extremitate linguae. Illud autem quod est de lingua amplum est minoris sensus. Et lingua sentit omne illud quod est commune omni corpori in sensu, scilicet caliditatem et frigus, duritiem et mollitiem. Et hoc facit per omnes suas partes. Et creatio linguae est ad gustandum humiditates et ad sermocinandum. Et lingua hominis est absoluta valde, mollis et lata, ut utatur in duabus operationibus, gustu scilicet et sermone. Et lingua mollis et lata conveniens est ad bonitatem sermonis, quoniam extenditur et contrahitur et gyratur circumquaque in ore modis diversis, et quando lingua fuerit absoluta et lata potest sermocinari bene. Et hoc manifestum est ex illis qui habent linguas ligatas, quoniam quidam sunt trauli, idest blaesi. Et quidam habent aliam occasionem in lingua. Et hoc accidit nonnisi in quibusdam litteris, quando lingua fuerit stricta et non fuerit lata; quoniam parvum est in magno, magnum autem non est in parvo. Et propter hoc avis latae linguae potest proferre aliquas litteras vel verba, magis avibus strictae linguae.
In lingua, ut dictum est, confessio designatur, in qua debet revelari omne illud quod est commune toti corpori, idest quod communiter committitur in toto corpore, scilicet in caliditate ignitae superbiae, in frigore malitiae et pigritiae, in duritia avaritiae, in mollitie lasciviae et luxuriae. Et sicut creatio linguae est ad gustandum et ad sermocinandum, sic duplex est linguae confessio, scilicet laudis et criminis.
In confessione laudis, utpote in officiis et psalmodiis; quae si devote agimus, gratiam compunctionis et dulcedinem contemplationis degustamus. Unde gregorius: Vox, inquit psalmodiae, cum per intentionem cordis agitur, per hanc omnipotenti Deo ad cor iter paratur, ut intentae menti vel prophetiae mysteria vel compunctionis gratiam infundat. Unde scriptum est: "Sacrificium laudis honorificabit me" (Ps 49,23) etc. Dum enim per psalmodiam compunctio effunditur, via nobis in corde fit, per quam ad Iesum in fine pervenitur.
Obsecramus ergo vos, fratres carissimi, ut iste ignis sedeat, idest requiescat super singulos vestrum, qua vestrae linguae sint dispertitae in confessione peccati et ipsius circumstantia, ut absolute, nude et plenarie confitentes, ad confitendum nomini Domini cum angelis in caelesti Ierusalem pervenire mereamini. Ipso praestante, cuius ignis in Sion et cuius caminus in Ierusalem (cf. Is 31,9), qui vivit et regnat in saecula saeculorum. Amen.
V. DE FRUCTIBUS GRATIAE SANCTI SPIRITUS
De his duobus habes concordantiam in Threnis Ieremiae: "De excelso misit ignem in ossibus meis et erudivit me" (Lam 1,13). Pater "de excelso," idest "Filio", misit hodierna die "ignem", idest Spiritum Sanctum, "in ossibus meis," idest in apostolis, dicit Ecclesia, "et" per ipsos "erudivit me," ut sciam et velim.
De his aquis dicitur in Genesi: "Congregationes aquarum appellavit maria" (Gen 1,10). Divitiarum congregatio nihil aliud est quam tribulationis et doloris amaritudo. Unde Habacuc: "Vae qui multiplicat non sua! Usquequo aggravat contra se densum lutum?" (Hab 2,6). Lutum in domo congregatum foetorem exhalat; dispersum, terram foecundat. Sic divitiae, cum congregantur, et maxime de non suo sed ex alieno, peccati et mortis foetorem generant; si vero pauperibus dispergantur, et propriis dominis restituantur, terram mentis foecundant et fructificare faciunt.
Abyssus est cor hominis, de quo dicit Ieremias: "Pravum est cor hominis et inscrutabile; quis cognoscet illud?" (Ier 17,9). Fontes huius abyssi sunt cogitationes, quae tunc clauduntur, cum gratia Spiritus Sancti infunditur. Super hoc habes concordantiam in secundo libro Paralipomenon, quod Ezechias "congregavit plurimam multitudinem; et obturaverunt cunctos fontes et rivum qui fluebat in medio terrae, dicentes: Ne veniant reges Assyriorum et inveniant aquarum abundantiam" (2Par 32,4). Ezechias est vir iustus, qui debet congregare plurimam multitudinem bonarum cogitationum et obturare fontes iniquarum et perversarum cogitationum et rivum concupiscentiarum, ne daemones, aquarum abundantia inventa, per ipsam destruant animae civitatem.
Cataractae caeli sunt fenestrae. Fenestrae dictae, quod lucem ferant vel quia per eas foras videmus. "Phos" enim graece, "lux" dicitur latine. In capite, quasi in firmamento posita, sunt duo luminaria, idest duo oculi, tamquam duae fenestrae per quas videmus; quae tunc clauduntur a mundi vanitate, cum menti infunditur lumen gratiae. Pluviae dictae, quasi fluviae, sunt verba, quae sine obice vel obstaculo largiter undique fluunt. Unde Salomon in Parabolis: "Qui dimittit aquam caput est iurgiorum" (Prov 17,14). Et ideo consulit Ecclesiasticus: "Ne des aquae tuae exitum, nec modicum" (Eccli 25,34). Hae pluviae tunc prohibentur, cum, Sancti Spiritus gratia, lingua in sui Creatoris laude et in sui criminis confessione formatur. Bene ergo dicitur: "Et repleti sunt omnes Spiritu Sancto."
De talibus et his similibus dicit Dominus in Ieremia: "Ecce ego ad prophetas, qui furantur verba mea unusquisque a proximo suo. Ecce ego ad prophetas, ait Dominus, qui assumunt linguas suas, et aiunt: Dicit Dominus. Ecce ego ad prophetas somniantes mendacium, ait Dominus, qui narraverunt ea et seduxerunt populum meum in mendacio suo et in miraculis suis; cum ego non misissem eos, nec mandassem eis: qui nihil profuerunt populo huic, dicit Dominus" (Ier 23,30-32).
Loquamur ergo prout Spiritus Sanctus dederit eloqui nobis, ipsum humiliter et devote postulantes, quatenus gratiam suam infundat, ut diem Pentecosten in quinque sensuum perfectione et decalogi observatione compleamus, et spiritu vehementi contritionis repleamur, et linguis igneis confessionis accendamur, ut accensi et illuminati in splendoribus sanctorum Deum trinum et unum videre mereamur.
Ipso praestante, qui est trinus et unus Deus, benedictus in saecula saeculorum.
Dicat omnis spiritus: Amen. Alleluia.